Ինչպե՞ս բողոքարկել ճանապարհային ոստիկանության տեսախցիկի տուգանքը. ամբողջական ուղեցույց

Երբևէ ստացե՞լ եք տուգանք ճանապարհային տեսախցիկից, որի հետ համաձայն չեք եղել։ Սխալմունքները պատահում են, և յուրաքանչյուր վարորդ ունի իր իրավունքները պաշտպանելու հնարավորություն։ TUGANQ.COM-ը ներկայացնում է մանրամասն ուղեցույց, թե ինչպես կարող եք բողոքարկել վարչական ակտը Հայաստանում։

Նախքան սկսելը. ռիսկերի գնահատում

Բողոքարկման գործընթաց սկսելուց առաջ կարևոր է հասկանալ հնարավոր ռիսկերը.

• Զեղչի կորուստ: Վարչական ակտը վերադաս մարմնում բողոքարկելիս Դուք կորցնում եք տուգանքը 30% զեղչով վճարելու հնարավորությունը։

• Դատական ծախսեր: Եթե գործը հասնի դատարան, պատրաստ եղեք լրացուցիչ ծախսերի՝

- Պետական տուրք (ՀՀ Վարչական դատարանի պետական տուրքի հաշվիչ)

• Փոստային և նամակագրության ծախսեր

• Հնարավոր իրավաբանական կամ փաստաբանական ծառայությունների վճարներ

Քայլ 1. Վարչական բողոքարկում (Արտադատական կարգ)

Սա բողոքարկման առաջին և պարտադիր փուլն է։ Դուք ունեք 30 օր՝ ակտի մասին ծանուցումը ստանալու պահից։

Բողոքը կարելի է ներկայացնել երկու եղանակով.

Փոստային առաքմամբ. Բողոքը հասցեագրեք ՀՀ ՆԳՆ ոստիկանության ճանապարհային ոստիկանությանը։

Առցանց՝ e-request.am կայքի միջոցով. Սա ամենահարմար տարբերակն է։

• Գրանցվեք կայքում։

• «Ում եք ուղղում Ձեր նամակը» դաշտում ընտրեք «ՀՀ ոստիկանություն» կամ «ՀՀ ներքին գործերի նախարարություն»։

• Կցեք Ձեր բողոքը և անհրաժեշտ ապացույցները (եթե առկա են)։

e-request.am կայքում գրանցվելու և դիմում-բողոք ուղարկելու մանրամասն ուղեցույցը կարող եք գտնել այստեղ

Սովորաբար, բողոքի պատասխանը տրվում է 30-օրյա ժամկետում։

Քայլ 2. Դատական բողոքարկում

Եթե Ձեր վարչական բողոքը մերժվել է, սակայն Դուք շարունակում եք վստահ լինել Ձեր իրավացիության մեջ, կարող եք դիմել դատարան։

• Ժամկետ: Մերժման որոշումը ստանալուց հետո 2 ամսվա ընթացքում։

• Դատարան: Հայցադիմումը պետք է ներկայացնել ՀՀ վարչական դատարան (հասցե՝ ք. Երևան, Գարեգին Նժդեհի փող., 23 շենք)։

• Անհրաժեշտ փաստաթղթեր:

- Հայցադիմում

• Պետական տուրքի վճարման անդորրագիր

• Վարչական բողոքի մերժման որոշման պատճենը

• Անձնագրի պատճեն

• Հայցադիմումը պատասխանողին (ՃՈ) ուղարկելը հաստատող փոստային անդորրագիր

Կարևոր է հիշել. եթե դատարանում հաղթեք գործը, Ձեր կողմից վճարված պետական տուրքը կվերադարձվի։