Ինչպե՞ս բողոքարկել ԱՊՊԱ որոշումը. ամբողջական ուղեցույց

ԱՊՊԱ պատահարից հետո ապահովագրական ընկերության կայացրած որոշումը միշտ չէ, որ վերջնական է։ Եթե դուք համաձայն չեք գնահատված վնասի չափի կամ մեղավորության հարցի հետ, դուք ունեք այն բողոքարկելու լիարժեք իրավունք։ Այս ուղեցույցում մենք մանրամասն կներկայացնենք բողոքարկման ամբողջ գործընթացը Հայաստանում։

Ի՞նչ կարելի է բողոքարկել

ԱՊՊԱ որոշումներում հիմնականում բողոքարկվում է երկու հարց՝

Գնահատված վնասի չափը։ Սա ամենատարածված դժգոհության պատճառն է։

Մեղավորությունը։ Որոշում, թե վթարի համար կողմերից ով է մեղավոր։

Ինչո՞ւ է վնասը թերի գնահատվում

Վնասի ցածր գնահատումը կարող է ունենալ ինչպես օբյեկտիվ, այնպես էլ սուբյեկտիվ պատճառներ։

• Բացթողումներ։ Խոշոր վթարների դեպքում փորձագետը կարող է պարզապես չնկատել որոշ վնասված դետալներ, որոնք թաքնված են։

• Միտումնավոր քիչ գնահատում։ Երբեմն ապահովագրական ընկերությունները փորձում են գումար խնայել՝ հույս ունենալով, որ հաճախորդը չի բողոքարկի որոշումը։

Կարևոր նախապայմաններ

• Ճիշտ էլեկտրոնային հասցե։ ԱՊՊԱ գործընթացում ամբողջ հաղորդակցությունը, ներառյալ որոշման մասին ծանուցումները, կատարվում է էլ․ փոստով։ Սխալ հասցեի դեպքում դուք կարող եք բաց թողնել բողոքարկման կարևոր ժամկետները։

• Ինքնաշխատ գործընթաց։ Եթե պատահարը գրանցվել է ASWA հավելվածով կամ Ոստիկանության կողմից (առանց մարմնական վնասների), հատուցման գործընթացը մեկնարկում է ավտոմատ կերպով՝ առանց ձեր դիմումի։

Բողոքարկման փուլերը

Գոյություն ունի բողոքարկման մի քանի հաջորդական տարբերակ։

Փուլ 1. Լրացուցիչ փորձաքննություն

• Ո՞վ է իրականացնում։ Ձեր ապահովագրական ընկերությունը։

• Ժամկետ դիմելու համար։ Որոշման մասին ծանուցումը ստանալուց հետո 2 աշխատանքային օր։

• Արժեք։ Անվճար։

• Արդյունք։ 3 աշխատանքային օրվա ընթացքում։

Փուլ 2. Կրկնակի փորձաքննություն

• Ո՞վ է իրականացնում։ Հայաստանի ավտոապահովագրողների բյուրոն։

• Ժամկետ դիմելու համար։ Որոշման մասին ծանուցումը ստանալուց հետո 5 աշխատանքային օր։

• Արժեք։ Վճարովի (5,000 - 49,000 ՀՀ դրամ)։

• Արդյունք։ 3-5 աշխատանքային օրվա ընթացքում։

• Կարևոր է։ Բյուրոյի կողմից տրված եզրակացությունը համարվում է վերջնական, և դրանից հետո հնարավոր չէ դիմել Ֆինանսական համակարգի հաշտարարին։

Փուլ 3. Վերջնական բողոքարկում Եթե դուք գոհ չեք նախորդ փուլերի արդյունքներից, ձեր հետագա քայլերը կախված են նրանից, թե արդյոք դիմել եք Կրկնակի փորձաքննության։

• Եթե ՉԵՔ դիմել Կրկնակի փորձաքննության.

- Ֆիզիկական անձինք կարող են դիմել Ֆինանսական համակարգի հաշտարարին (6 ամսվա ընթացքում) կամ միանգամից դատարան։ Ուշադրությո՛ւն. հաշտարարին դիմելու դեպքում դուք կորցնում եք դատարան դիմելու իրավունքը։

• Իրավաբանական անձինք կարող են դիմել միայն դատարան։

- Եթե ԴԻՄԵԼ ԵՔ Կրկնակի փորձաքննության.

• Միակ տարբերակը դատական կարգով բողոքարկումն է։

Հիշեցում: Դատարան դիմելու համար պարտադիր պայման է Բյուրոյի կողմից անցկացված կրկնակի փորձաքննության առկայությունը։